عاوز أتكلم... عاوز أكتب

بداية... أنا مش المفروض أبقي قاعد بكتب الكلام ده خاااااااااااااااااالص.... لأني نظريا المفروض إني مزنوق جدا في الوقت و عندي عرض كتاب بكره، و تسليم عرض كتاب تاني بعده، و تسليم عرض مقال برضه آخر الأسبوع، و هذا كلته بالإضافة إلي جبال المذاكرة اللي محتاجة تتهدم طوبة طوبة، فصل فصل و مادة مادة.... يعني بالصلاةُ علي النبي كدهوة... أنا أستحق لقب أكبر مستعبط في التاريخ عن جدارة... هل من منافس؟؟؟ و بما إني كتبت قبل كده عن نفسي و حالاتي كذا مرة(هنا و هنا و هنا و هنا و هنا و هنا)، فيللا مش مهم بأه المرة دي...

المهم بأه ايه... أنا اتخنقت.. عاوز أتكلم و أكتب ، و مفيش وقت (نظريا برضه)...

عاوز أكتب علي اللي حصل عند مجدي بعد أول طوبة حدفها،و الهيصة اللي حصلت عليها... و اللي حصل مع إبراهيم بعد اللي قاله عند مجدي... و اللي الناس الكتير قالوه عن الموضوع ده...

عاوز برضه أكتب عن سؤال بقالي كتير عاوز أكتب عنه، من ساعة ما ناس كتير بقت تسألني عليه.. هو أنهي أخطر إيران وللا إسرائيل؟

عاوز أكتب عن حاجات كتير عن كليتي العظيمة (فـ - يـ - بـ - ـس)، حالها و أساتذتها، و نشاطها، و طلابها (و نفسي أعمل موضوع خاص جدا عن دفعتي العظيمة، و موضوع خاص أكتر عن مجموعة الفكر العربي، و موضوع خاص أكتر و أكتر و أكتر عن مجموعة معينة في بالي... أهالي آفاق المبجلين)، و حتي عمالها اللي بيفهموا في السياسة ههههههه.. ما عليناااااااا

عاوز أكتب عن تركيا و اللي بيحصل هناك... و حزب العدالة و التنمية... و معادلة غريبة جدا، و جديدة جدا، و تستحق الاحترام و الدراسة
عاوز أكتب عن فلسطين و اللي بيحصل مع حماس، و تجربة تشهد بالصمود الذي لم يكن متوقع... مسبباته و نواتجه ، و نظرة علي المستقبل

عاوز أتكلم عن بلدنا و اللي بيحصل فيها، و الاعتقالات، و المحاكمات العسكرية، و الشعب التايه، و المصلحين النايمين... و هو ازاي أساسا المفروض الدنيا تتصلح؟ من فوق لتحت؟ وللا من تحت لفوق؟

عاوز أتكلم عن أين الخلل؟

عاوز أتكلم عن شخصيات أثرت في حياتي... و مواقف أثرت في حياتي برضه...

عاوز أتكلم عن سؤال النهضة... و استلهام من خبرات حياتية...

عاوز أتكلم عن السلوك و القيم.. من التشجيع إلي الضبط و حتي الاستبعاد (خاصة فيما يخص الإصلاح، و الاستبداد و القمع)

.............

يا ناااااااااااااااااااااس.... عاوز أتكلمممممممممممممممممممممم.... نفسي أكتببببببببببببببببببببببببب...

و نفسي – مش زي نفسه الأولانية – زي نفسه التانية كده...

و نفسي بقي أكتر حاجة... إني أتصرف كإنسان و أقوم أذاكر دلوقتي...

و بما إني مقتنع إني لما بقول لحد يدعيلي بينسي أكيد... فكل اللي هيقرا الكلام ده، يدعيلي دلوقتي حالا... سامع انت وهو و هي... رايحين فين؟ لسه مدعيتوش... دعيته خلاص؟ طيب خير، يللا مع السلامة....

و أشوفكم في ظروف أحسن من كده