أبوك قفش عليك؟ اعمل اعتصام في أودته، أو طلع له مظاهرة!

- يا عبد الرحمن... عبد الرحمن... يااااا عبد الرحمااااان...

كنت نايم علي سريري جنب سلحفتي، وبعدين سمعت حد بينادي عليا...

إيه ده؟... ده أبويا!

نعم يا أبي...

- بص يا عبد الرحمن، قرار غير قابل للمناقشة، وغير قابل للمراجعة: تخرج زي ما تخرج، بس تكون هنا قبل العصر!

ماشي!

آثرت الانسحاب في صمت، وتفادي أي حوار مع أبي في وهو علي هذا الحال من الثورة والغضب...

- - - - -

وبعدين؟

تاني يوم، أبويا دخل البيت حوالي الساعة واحدة -باليل طبعا-، وراح علي أودته من غير ما يكلمني، بس هو لقاني مستنيه هناك، رغم إني كنت نايم في أودتي!

- إيه يا عم ده، عبيط الواد عبدو ده ولا إيه؟

لأ لأ عيب!
هوا أنا صحيح ساعات -الحقيقة غالبا- ببقي عبيط، بس مش للدرجة دي!

حل اللعز ده ببساطة إن دادي دخل أودته لقي ده في وشه:

[ قرارت غير قابلة للمناقشة/ المراجعة = كرارات غير قابلة للتنفيذ ]

- - - - -

- كده انتهي الفيلم!
لأ، طبعا!

البداية بقى إني في الفترة الأخيرة كنت مشغووووول حبتين، من تسعة أو عشرة الصبح مثلا، لغاية اتناشر واحدة برة البيت، وما كنتش باكل كويس، وكمان -وهو الأهم- مكنتش بروح جلسات العلاج الطبيعي بتاعتي...

ماي فاذر -اللي بأناديه يا أبي- مكنتش بشوفه تقريبا؛ باعتبار إنه برة البيت طول النهار وزلفا من الليل، أما مامي -اللي بقولها أماه- فكنت ساعات بشوفها، لما بأكون أنا وهي في البيت؛ حيث أنها ساعات بتكون في المركز بتاعها -مركز ...-.

- - - - -

هما طبعا ليهم حق في أنا مقصر في حاجات كتييييير، بس اللي هما فاهمينه ومتأكدين منه تو هندريد في المية إن الأسلوب ده مش بينفع، وعلي رأي أبو الغزالين ما بياكلش -خصوصا- معايا...
من الآخر كده -وعلي رأي أبو الغزالين برده- محدش يحاول يتعاطى معايا بالطريقة دي!
والأغرب إن هما اللي علموني كده، فميصحش حد ياخد قرارات لشخص آخر يفترض به أنه راشد وبالغ وعاقل، بالذات بقى لو مطرقع ومهيس زيي كده.

يومها ما كانش ينفع اتكلم معاهم، لكن بعد ما علقت الورقة دي الموضوع انتهي خالص -أو هكذا أظن-، كإنه ما حصلش!

فلو أبوك/ ي قافش عليك/ ي اعمل/ ي اعتصام في أودته، أو طلع/ ي له مظاهرة!