إلي دفعتي القديمة... إلي دفعتي الجديدة...

بما إني كنت علمي رياضة...
إذن هاكتب التدوينة دي كإني بحل مسألة عبقرية من مسائل الهندسة القلة؛
باعتبار إني لسا طالب!

:: المعطيات ::

عبدو بن خلدون، دفعتي العظيمة القديمة، دفعتي الأعظم الجديدة، فيبس

:: المطلوب ::

حاجات جوا لازم تطلع، وفقط!

:: البرهان ::

بما أن السنة خلاص بتخلص
إذا أنا علي وشك إني أسيب دفعتي العظيمة ..... [1]

برده بما أن السنة خلاص بتخلص
إذا أنا علي شفا الانضمام إلي دفعتي الأعظم الجديدة ..... [2]

بما أن حضرتي بيحب دفعتي العظيمة القديمة
إذا شيء طبيعي ومحوري وجوهري إني أقول لهم ..... [3]

بما أن سيادتي برده بيحب دفعتي الأعظم الجديدة
إذا لازم وقطعا وحتما وأساسي ولابد أقول لهم ..... [4]

بما إن إنا ده وقت امتحانات
إذا الطلبة بتمتحن

بما إن دفعتي القديمة ودفعتي الجديدة طلبة
إذا دفعتي القديمة والجديدة بيمتحنوا ..... [5]

بما إن الكلام ده مهم
بما إن فضيلتي بقاله أكتر من ربع ساعة بيعك علي الكيبورد
بما إن عندي كلام لازم أقوله
بما إن إنتم لازم تسمعوه

إذا اسمعوا وعووا

من [1] و[2] و[3] و[4] و[5] و[6] و[7] و[8]
مهم وحيوي وضروري
تعرفوا
إني بحبكم كلكم طحن
وإني كان نفسي -يعني مش نفسي قوي- أكون معاكم في الامتحانات
وإن إنتم وحشتوني
وإن إنتم بتوحشوني
وإن إنتم هتوحشوني
ومش عيب خالص لو عرفتوا برده إني
بحبك يا فيبس

مهم تعرفوا ده كله
وممكن تعرفوا برده إن أنا بستعبط لإن مفيش [6] و[7] و[8]
فكملوهم من عندكم

#
وهو المطلوب تهييسه