[ إضاءات ]

"من علمني حرفا... صرت به حرا" أستاذي سيف الدين .....| | | | |..... "هناك فرق بين أن تكون عالما، وأن تكون إنسانا" كولن .....| | | | |..... "إن الدعاة اليوم لا يفتقرون إلي الإخلاص... وإنما في كثير من الأحيان إلي الحكمة" أستاذتي هبة .....| | | | |..... "الاجتهاد مبدأ الحركة في الإسلام" محمد إقبال .....| | | | |..... "الطاقة الإبداعية بحد ذاتها مطلب شرعي ومقصد إيماني‏" فالإبداع "صنو الاجتهاد، ورديف له، من الصعب أن ينفك أي منهما عن الآخر" طه جابر العلواني .....| | | | |..... "ولا تزال الدنيا عامرة وديار المسلمين في سلام ما أخبتت النفوس وهبطت ساجدة تردد: "رب زدني علما" محمد أحمد الراشد .....| | | | |..... السياسة ما كان من الأفعال بحيث يكون الناس به أقرب إلى الصلاح وأبعد عن الفساد، وإن لم يشرعه الرسول -صلى الله عليه وسلم- ولا نزل به وحي، فإن أردت بقولك: لا سياسة إلا ما وافق الشرع: أي لم يخالف ما نطق به الشرع فصحيح، وإن أردت ما نطق به الشرع فغلط وتغليط للصحابة" الإمام ابن عقيل الحنبلي .....| | | | |..... "طلب الحرية مقدم علي تطبيق الشريعة... تقديم ترتيب، لا تقديم تفضيل" فهمي هويدي .....| | | | |..... "الإنسان المعاصر إنسان ذو بعد واحد، فاقد الهوية، وصاحب نزعة استهلاكية، وقليل الحساسية تجاه الغير، ويعاني عزلة وضياعا، وهو أسير المرحلة الراهنة، والسرعة الفائقة، والوقائع السريعة الكفيلة بأن تُنسيه ما قبلها، وتتركه يتحفّز لما بعدها" مدرسة فرانكفورت .....| | | | |.....

الثلاثاء، ربيع الأول ٠٨، ١٤٢٨

هوامش علي دفتر اللي جراله: 2/؟

[ سموها بمعرفتكم! ]

سموها مقدمة أو بداية أو افتتاحية أو توطئة أو اتفاق ناس جدعة أو كلام رجالة أو وش القفص أو فتحة خير أو إثبات قيد أو بدل فاقد أو أي حاجة كويسة وخلاص... المهم:
كثير من هذا الكلام لست متأكدا من درجة عموميته، ومدى صحته، يعني كل الناس المحترمين اللي وصلوا لغاية هنا قبل ما يقروا، أو يحاولوا يعكوا بأية طريقة كانت أو أصبحت أو أمست أو باتت... إحم إحم لا مؤاخذة...
كنا بنقول إيه؟
آه، كل الناس المحترمة قبل ما يقروا أو يعكوا بأية طريقة -بلاش كانت بقى المرة دي- يصلحوا نيات سيادتهم، ويعدلوا نضارات حضراتهم، ويفتحوا إدمغة سعادتهم...
ومن ثم لا يجب أن يفهم أي بني آدم/ أية بنت حواء أشياء غريبة وعجيبة ومتلونة من أي حاجة هتلاقوها هنا...
هنا يا أبيض يا أسود!
أي نعم... اللون الرمادي خلاويص، يمكن تلاقوه في الدكاكين اللي جنبنا!

وأتمنى ألا أجد إنسا يقوِّلني ما لم أقله، ويبني كشكا من الأحكام المسبقة، أو يفتكر كبشة صور ذهنية خاطئة، ولا لبشة أساطير منسية، ويتخذ علي أساسها موقفا عدائيا وعدوانيا واستباقيا... ما تخلونا صحاب أحسن. ولا إيه؟
لست هنا في موقع من يلقي الاتهامات، أو يبحث عن ضحية، أو يفتش في الضمائر، أو يسعى خلف سراب أي حاجة ملهاش لازمة... شغلنا كله في النور، وعلي بياض، وسلمني نضيف أسلمك نضيف...

هدفنا هو الحقيقة، وبالمناسبة بيقولوا "قد تتعدد الحقائق... ولكن تظل الحقيقة واحدة". أهي الحقيقة دي بقى هي اللي إحنا عايزينها، وإن شاء الله نجيبها، بس مش من قفاها زي أمن الدولة ما بيعمل.

بعبارات أكثر تقعررا وتعقددا، وبمعنى أدق وأشد وضوووحا: حديثي كله عبارة عن "ادعاءات"، وفضيلتك هتلاقي إنك ممكن تفرق/ ي بين حاجتين يمكن تصنيف كلامي علي أساسهما:

أولا: ادعاءات بحقائق .: Claims of Facts :. وهي وجهات النظر المتعلقة بما هو "كائن" أو موجود "فعلا".

ثانيا: ادعاءات بقيم .: Claims of Values :. يعني آراء مرتبطة بتفضيلات شخصية واختيارات فردية تعبر عما "يجب" أن "يكون".

أوعدكم، سأبذل أطول جهدي -معرفش بيقولوا قصارى ليه؟!- كي يكون معظم كلامي من القطعية الأولانية؛ عشان ما نبقاش بنبيع سمك في ميه، وتقولوا لي: قطيعة تقطعه هوا واللي يتشدد له...
وحتى عندما نجد اختلافا في النوع الثاني فهو المفروض إنه بيكون حاجة كده زي الدكاترة ما بتقول: صحي ومفيد وزي الفل، والبيت الذي تدخله الشمس لا يدخله الزبيب...
من الآخر، فلنحاول أن نجعل اختلافات ادعاءاتنا بخصوص قيم معينة منطلقة من أساس متين، أو طالعة من فرشة كده بنت حلال، وهي: الحقائق المتفق عليها... وإلا يبقي نروح نقعد في بيوتنا أحسن، بدل حوار الطرشان اللي هنعمله ساعتها!


طالع/ ي أيضا:

هوامش علي دفتر اللي جرى
مولد التدوين في مصر
المداخل التفسيرية_1
المداخل التفسيرية_2

هناك ٣ تعليقات:

عمرو طموح يقول...

و ماله... مش عيب...

الدكتور بيقول إن في أمل... و كان في حالة زي كده قبل كده و اتعالجت الحمد لله...

يابني ارحمنا و خش في الموضوع علي طول...

تدوينتين بتمهد فيهم؟؟

هتبقي انت و القانون اللي امتحانه كمان كام ساعةو لسه بتعرف عليه... وللا النظام المصري الغبي - المادة مش الموجود فعليا و لو إنهم هما الاتنين زي بعض في الغباء - ...

دعواتك... و ارحموا من في الأرض يرحمكم من في السماااااااااااء

عبدو بن خلدون يقول...

هما خمس كلمات

:

اتقل

علي

الرز

يا

خفيف

Sanaa basha يقول...

ممكن يكون موقفى منه بيغلب عليه "الادعاء بالقيم " خصوصا إنه أكثر تعقيدأ من أن يحتمل أى عك فى الحوار ,أنا أفضل الاستماع ليكم وشكرا يا بن خلدون عشان بتحاول تخلى صفحة عندك للموضوع ده ,وإن كنت مش متأكدة أن الاستجابة تكون كبيرة
أهم عبارة فى الموضوع ده ,اللى لو صدقا وحقا اتطبقت هيكون النقاش مثمر جدا
هى "لست هنا في موقع من يلقي الاتهامات، أو يبحث عن ضحية، أو يفتش في الضمائر، أو يسعى خلف سراب أي حاجة ملهاش لازمة... شغلنا كله في النور، وعلي بياض، وسلمني نضيف أسلمك نضيف "
وان كنت لا استسيغ الجزء الاخير منها ,وده أيضا ادعاء بقيمة
:)))
ويا بخت اللى عنهم وقت دول
انا عاوزة أجازة يوم واحد بس
يحمييييييييييييييييييييييييييكم