سنة حلوة يا جميل... رغم الظلم... رغم أنف الظالمين!
مش عارف ليه كل ما يكون عندنا مناسبة سعيدة، لازم
البعاد دول يشاركونا...؟!
أول مرة كنا يا دوب لسا هنسافر مع دادي، أما المرة دي بقى فكنا عاملين حفلة صغنطوطة خالص عشان عيد ميلاد أبويا: البيج بتاعنا، وعيد ميلاد مريم: آخر العنقود...
يوم التلات ده يوم الفحت العالمي بالنسبة لي؛ في اليوم ده بيكون عندي محاضرات شبه متواصلة من 9 الصبح لحد 6 بالليل وبعدين عندي معاد بعد العشاء...
بس التلات اللي فات كنت مرهق جدا، واعتذرت عن المعاد ورجعت البيت مش شايف قدامي خالص، ده أنا حتى ما قدرتش آكل معاهم من التورتة غير كريزة واحدة بس!
كان أجمل حاجة لما رحت حضنت سريري ونمت...
ياااااه!
الليل جميل قوي
...
بش يبدو إنه حتى جمال الليل حرام علينا
جمال واحد بس هو اللي حلال!
يللا مش مهم أو يللا في داهية..
تخيل سعادتك وتصوري حضرتك بني آدم إن دي مجرد البداية
الساعة اتنين ونص بالليل لقيت
عمار بيصحيني
"فيه إيه يا ابني؟!"
"قوم يللا عشان فيه أمن دولة تحت"
طان طان طان طااااان!
أيها الظالمون مهلا...
لأ
...
جايز كنا في لحظة
خايفين
أو قلقانين
أو زعلانين
بس دلوقتي
لأ
...
الخوف ده كان وهم
وانتهي
نخضع؟
لا
...
نرحل؟
لا
...
نسكت؟
لا
...
ننسى؟
لا
ما تفتكروش إنكم كده هترتاحوا!
ده بُعدكم
...
هنشتغل وربنا معانا
الحرية جاية جاية
دي شيء منتهي
المسألة مسألة وقت بس
فين وإمتي وإزاي
هتفضل روحنا
وروح كل حر
نور
...
نور
ينور الضلمة
يحرق الخفافيش
يعمي عيون الظلمة
ويرجع للحياة طعمها
يعيد للورد الدبلان ألوانه
يا ترى يا اللي بتقرا
حاول تجاوبني
...
لما كبشة ظباط وجنود يائسين يقتحموا بيتك
عشان يعتقلوا أبوك
وظابط داعر يضرب أخوك
وواحد من القوات الخاصة يحاول يقبض علي أخوك التاني
عشان ياخدهم رهائن
هتعمل إيه؟
...
طب ولو كان الراجل ده
طولك مرتين تلاتة
...
مش بس كده!
ده ماسك لك في إيده مدفع رشاش
هتعملي إيه؟
...
طب ولو كان عندك 12 سنة
قولولي بقي
نتصرف كيف يا عبرحيم؟
هتعملوا إيه؟
هتقفوا؟!
ده اللي فاطمة أختي عملته!
وقفت في وشه
وقالت له
مش هتدخل
مش هاتعدي
بعد كده
فكروا
بكرة جاي
ولا لأ؟
فكروا
هنفضل نحلم ببكرة
هنحلم
هنتكلم
هنشتغل
نحنا أعلي
نحنا أقوى
رغم الدموع
رغم السجون
كل سنة وإنت طيب يا أبي
...
كل سنة وإنت حر يا جميل
بكرة جاي
بكرة جاي
بكرة جاي
بكرة جاي
...
ولو ما جاش
إحنا نجيبه!
هناك ٣ تعليقات:
السلام عليكم و رحمة الله و بركاته
عبد الرحمن انت سألت سؤال فى التدوينة دى .. اسمحلى بس اجاوب عليه
انت سألت و قلت : بكرة جاي
ولا لأ؟
أيوة بكرة جاى .. و للأحسن كمان باذن الله ..
طول ما فى فاطمة حسام حيكون فى امل فى بكرة
طول ما فى عبد الرحمن حسام حيكون فى أمل فى بكرة
طول ما فى سمية حسام حيكون فى أمل فى بكرة
طول ما فى عمار و على ايه و حتى مريم حيكون فى أمل فى بكرة
و طول ما فى أب و أم زى والدتك و والدتك همهم انهم يربوا ولادهم على دينهم و على الحرية و على كل حاجه كويسة ممكن تخلى الانسان أحسن .. و ممكن تخلى مستقبلنا أحسن .. يبقى فى أمل فى بكرة باذن الله
فى حاجة حلوة أوى بتكتبها فى توقيعك على الميل فى اى رسالة بتبعتهالنا
the future belongs to those who
prepare for it today
ربنا يعينا كلنا على اننا نكون سبب فى اننا نخلى بكرة احسن باذنه
و ربنا يجعلك خير عون و سند لأسرتك بعده لتجاوز هذه الظروف الحالية
دعائنا لكم موصول ..
ربنا يعينك يا عبدالرحمن و يثبتك انت و اسرتك
متفائلة انا ان بكرة احسن ... ان شاء الله بكرة احسن
لك الله
دعائنا معاكم يا عبد الرحمن
الله يصبركم
انا بدأت اقنتع فعلا ان ربنا وراكوا الأشكال المقرفة دى عشان تدخلوا بيهم الجنة ..وعشان تتعلموا حاجة مهمة ...عشان تبقوا من الآخر رجالة
إرسال تعليق