الترابتوت... الترابتات...!
الترابتوت الترابتات ..
لأ اوعى تفوت دا التعلب فات
وقطف وخطف ونأف وغرف ..
وأخد ييجي كام مليون دولارات
واهو ساب وهرب بعد اما نهب ..
عجبين وعجب ..
دا رجع ولعب وكأنه ما فات
الترابتوت .. يا وابور يا حديد ..
ودبل شبكتنا حتبقى حديد
وان قلنا كفاية يقولوا مزيد ..
ما هو أصله زمان العز شديد
وياخد ما يفوت غير العضمات ..
الترابتوت الترابتات
الترابتوت .. يا رغيف العيش ..
أبو سم بكام .. ما تقول يا عليش
وابو رمل بكام وابو نمل بكام وابو ذل بكام ..
وبكام بقشيش ؟
يا رغيف مسخوط اسم الله عليك ..
واقف مبسوط ولا أجدع كيك
يا سعادة البيه .. يابو نص جنيه ..
اعمل فيك ايه ؟؟ وانا باحلم بيك
أمال لو كنت بجد نضيف ..
فاهم يا رغيف ؟
الترابتوت الترابتيت ..
النقطة بكام يا بتاع الزيت .. ؟؟
وده زيت معمول بحمام زغلول ؟؟!
والله احلويت بعد اما غليت وعليت وبقيت
زيت فوديكا يا زيت
على حبة فول حاكلك وحاقول
ابعد يا عزول أنا مش مسطول
ولا شارب زيت
التربتوت ع الحريات ..
الكل حيدخل لانتخابات ..
صور يا زمان وارقصوا يا بنات
هاتوا الصناديق واملوا الورقات ..
واختاروا بجد اللي تحبوه ..
ملعون الغش ويلعن ابوه ..
أيوه .. سلامات ياجدع حاسب لتتوه
وكفاية يا عم اتعشى وبات ..
وان جيت تحلم .. احلم بسكات ..
ولا ترابتوت ولا ترابتات ..
ولا تعلب جه ولا تعلب فات ..
واما تخلص حبسك وتفوت ..
من باب الحجز اجري وقول توت ..
وارقص واتمخطر بالنبوت ..
يابن اللي أكيد عملوا الصالحات
سمعنا يا عم الترابتوت ..
خلينا نقول الترابتات
ليست هناك تعليقات:
إرسال تعليق