[ إضاءات ]

"من علمني حرفا... صرت به حرا" أستاذي سيف الدين .....| | | | |..... "هناك فرق بين أن تكون عالما، وأن تكون إنسانا" كولن .....| | | | |..... "إن الدعاة اليوم لا يفتقرون إلي الإخلاص... وإنما في كثير من الأحيان إلي الحكمة" أستاذتي هبة .....| | | | |..... "الاجتهاد مبدأ الحركة في الإسلام" محمد إقبال .....| | | | |..... "الطاقة الإبداعية بحد ذاتها مطلب شرعي ومقصد إيماني‏" فالإبداع "صنو الاجتهاد، ورديف له، من الصعب أن ينفك أي منهما عن الآخر" طه جابر العلواني .....| | | | |..... "ولا تزال الدنيا عامرة وديار المسلمين في سلام ما أخبتت النفوس وهبطت ساجدة تردد: "رب زدني علما" محمد أحمد الراشد .....| | | | |..... السياسة ما كان من الأفعال بحيث يكون الناس به أقرب إلى الصلاح وأبعد عن الفساد، وإن لم يشرعه الرسول -صلى الله عليه وسلم- ولا نزل به وحي، فإن أردت بقولك: لا سياسة إلا ما وافق الشرع: أي لم يخالف ما نطق به الشرع فصحيح، وإن أردت ما نطق به الشرع فغلط وتغليط للصحابة" الإمام ابن عقيل الحنبلي .....| | | | |..... "طلب الحرية مقدم علي تطبيق الشريعة... تقديم ترتيب، لا تقديم تفضيل" فهمي هويدي .....| | | | |..... "الإنسان المعاصر إنسان ذو بعد واحد، فاقد الهوية، وصاحب نزعة استهلاكية، وقليل الحساسية تجاه الغير، ويعاني عزلة وضياعا، وهو أسير المرحلة الراهنة، والسرعة الفائقة، والوقائع السريعة الكفيلة بأن تُنسيه ما قبلها، وتتركه يتحفّز لما بعدها" مدرسة فرانكفورت .....| | | | |.....

الجمعة، رمضان ٢٣، ١٤٢٨

حسام بن الحاج أبو حسام خرج يا ردالة.... بالإنجليزي!


عقارب الساعة تقارب الثالثة... أقبع في الميكروباص عائدا من الكلية الفيبساوية...

سابحا بخيالي في بحر من الذكريات، محاولا -دون جدوى- استجماع أناسي المتلاحقة من فرط سرعة الأحداث والمشاهد المتتابعة علي مسرح الحياة في الأمس القريب...

تتوالي الصور... تتداعى المعاني... تتساقط العَبرة... تظهر العِبرة... وتتتجلى الحقيقة...

تتابع في ذهني المشاهد من الماضي غير البعيد... حادثة الميكروباص، زواج أختي سمية، مرض أمي، سفر أختي، اعتقال أبي... اعتقالات الإخوان، المحاكمات السعكرية، الحكم ضد إبراهيم عيسى ورفاقه، مظاهرات العطش، اعتقالات أخرى، مظاهرات العمال...

علي شطآن الأمل كنت أسير، متأملا في ذاك الفضاء السرمدي اللانهائي، وقد بدا في لحظة عبثية سوادا بلا معني تتلألأ وسطه نجوم، أبحث عن رابط يجمع تلك الأحداث، عَلِّي أجد ما يوضح الصورة فيمسح ما علاها من دخان، ويزيل ما علق بها من دماء، وما اعتلاها من عرق، وما شابها من أرق... وضوح يعيد للعقل اتزانه وجِنانه، وللروح حلاوتها وسموها، وللبدن رونقه وبهاءه... وضوح يسمح للصورة الحقيقية أن تظهر وسط ركام المشهد المزدحم.

تتقاذفني الظنون، وتساورني الهموم، وتطارحني الأفكار... وأنا في حالة عظيمة من الشرود والتأمل والبحث والتنقيب عن جديد يقلب الصفحة، أو يغير القناة، ومبـ...

اقتحم ذلك الصوت المزعج "خلوتي"، وسط ميدان السيدة عائشة...

يظهر التالي علي الشاشة البرتقالية: "أمي/ مامي/ أماه"...

سلام عليكم

- مبروك يا حبيبي

الله يبارك فيك!

- أنا في المحكمة، أبي والناس اللي معاه كلهم خدوا إفراج.

مبروك، الحمد لله، قشطة عليكي.

- إن شاء يوم السبت يكونوا كلهم في بيوتهم.

الحمد لله، طب وإيه أخبار الناس بتوع العسكرية.

- يوم الثلاثاء إن شاء الله.

يا مسهل، يخرجوا كلهم إن شاء الله.

- إن شاء الله يا حبيبي، مبروك.

الله يبارك فيكي.

- يللا تيجي بالسلامة.

- - - - -

يعني بالعربي كده عشان ما ندخلش في حوارات...

أبويا حسام بن الحج أبو حسام -اللي هو الحج بكر- خرج يا رجالة، بالإنجليزي طبعا!




فرحان

طبيعي إني أكون فرحان...

فرحان إن الحمد لله الموضوع القُلة ده هيخلص علي خير...

فرحان إني أشوف أبويا حر تاني، بيكمل مشوار حياته المنور، هو وكل الناس اللي معاه...

فرحان إننا إن شاء الله عدينا الأزمة دي علي خير...

فرحان كتير!

بس



في مشكلة صغيرة!

المشكلة خالص مش إن نيابة أمن سلطة مصر النزيهة ممكن تطعن علي هذا الحكم، أو حتى تاخدها من قاصرها وتعيد اعتقالهم مرة أخرى...

المشكلة خالص مش صغيرة...

المشكلة مش أب دخل السجن، وحلها مش مجرد إنه يخرج... المشكلة آلاف زي الأب ده، مستنيين يخرجوا لنور الحياة مية أخرى... المصيبة 40 من أشرف وأرجل رجالة في البلد بيتحاكموا عسكريا في الدرا، فلوسهم بتتنهب، أهاليهم بيتبهدلوا، عمرهم بيضيع، والأهم بلدهم بتتنهب قدامهم من غير ما يقدروا يعملوا حاجة... المأساة بلد ما فاضلش فيها إنسان، الفرد في بلادنا مواطن أو سلطان ليس لدينا إنسان علي رأي أونكل مطر، وفي رواية زويولوجية أخرى: الدابة في زريبتنا بهيمة أو حمار، ليس لدينا حيوان!

مش قادر

الحقيقة، مش قادر أفرح، أهبل اللي ما يكونش فرحان في موقف زي ده، بس يا خسارة فرحة ما تمت...

مش قادر أفرح والمحاكمات السعكرية لسا شغاله، وعلي ودنه، وعلي عينك يا تاجر...

مش قادر أفرح بإن العيد جه، وفيه آلاف الناس اللي زيي، أهاليهم مرميين في السجن، بقالهم سنين وشهور...

مش قادر أفرح وأنا شايف كل شمعة بتطفي قدام عينينا، لا كمان جوا عينينا، ما عادشي فيه شموع أو دموع!

مش قادر أفرح وأنا شايف بلدي بتتقطع قدامي ومحدش قادر يعمل حاجة...

مش قادر أفرح وفيه "أشياء" في البلد دي مش حاسة إنها بشر من لحم ودم، وليها حقوق وليها آدمية...

مش قادر أفرح والناس لسا نايمة؛ إما من كتر التعب من الشغلانات اللي شغالينها عشان يأكلوا عيالهم، أو من كتر السهر في القهاوي قدام ميلودي ومزيكا...

مش قادر أفرح وديننا مش موجود غير شعارات في حياتنا، الدين أوله رحمة وأوسطه عدل وآخره عتق، تحرير للإنسان، من كل شيء...

مش قادر أفرح وبلدنا بتتنهب قدام عينينا، وإحنا ساكيتن...

مش قادر أفرح والناس لسا مش حاسة إنها تقدر، وإن صوتها ممكن يتسمع لو حاولت... لكن

مش قادر أفرح وجوا صدري بركان مولع، وحريقة قايدة او كانت فولكانو حقيقي كانت ولعت الأرض بالمريخ في يوم واحد...

مش قادر أفرح...

مش قادر...

مش قادر أكمل!



هناك ٨ تعليقات:

Hend.feps يقول...

لسة حالا قارية خبر افراج عصام العريان و 9 من قيادات الاخوان فى اهرام الجمعة و قلت أدخل اسألك على الأخبار ...

ألف مبروك يا عبدالرحمن و اهو العيد هيجى ان شاء الله و والدك معاكم عشان بس متزعلش ... مبروك و يا رب تكون أخر الاحزان ...

مصطفي النجار يقول...

افرح يا عبده
دا جزء من الفرحة
كلنا فرحانين
كلنا مستنيين كل الناس تطلع
اي واحد بيخرج من خلف الاسوار
مصر بتفرح بيه
واكيد بيفيد اكتر
أليس الله بكاف عبده
أليس الله بكاف عبده

Sanaa basha يقول...

مش لاقية تعليق يا عبد الرحمن
المفروض نقول حاجة
بس الكلام اختفى
المفروض نعمل حاجة
بس احنا مش قادرين
المفروض.....
المفروض.....
المفروض.....
يا رب اكشف عنا العذاب انا مؤمنون

غير معرف يقول...

لقد أثرت بكلامك في النفس شجونا وأيقظت الاما كانت منزوية بفعل فاعل - اللي هو أنا - في ركن قصيّ من القلب ، لكي نكمل نحن الطريق
طريق خلاص هذه البلد من زبانيتها

فكّ الله قيد أسرانا

اللهم اهد قومي فإنهم لا يعلمون

عمرو طموح يقول...

...

...

...

!!!

الـفجـريـــة يقول...

لا.. افرح
كلنا فرحانين
كل مكلم حد فرحان الحمد لله
بنحتاج نفرح من وقت للتانى
ده من لطف الله بينا
وبالذات انها جت مفاجأة

عشان اكون صادقة
لو دققنا فى اللى بيحصل حوالينا
العسكرية او الحال عموما
والصمت..والظلم

ممكن نفتكر انما الحلم بالتحلم
والصبر بالتصبر
ونقول
والفرح بالتفرح

كله بالمحاولة ببيجى
!

Abdulrahman Mansour يقول...

لا تعليق

البكاء أجدي من أي تعبير!!

Mo3Az يقول...

اللهم لك الحمد

الا ان نصر الله قريب

الف بركة اخى الحبيب

وجعله الله فى ميزان حسنات اساذنا الدكتور

وفى ميزان حسناتك انت كمان ياعم ولا تزعل :)

افرح وافرح وافرح

وعقبال كل اخوانا اللى لسه

الحقيقة اول زيارة للمدونة ولاقيتها جميلة ما شاء الله ، بس نبقى نقرا المواضيع لها بعد رمضان باه ان شاء الله

وهتلاقينى على طول هنا ان شاء الله

:)

سلاام